ట్రంప్​ సన్నిహితుడు చార్లీ కిర్క్​ హత్య- యూనివర్సిటీ అంతా హడల్​!

Trump Ally Charlie Kirk Passed Away : అమెరికా అధ్యక్షుడు డొనాల్డ్​ ట్రంప్​ సన్నిహితుడు, కన్జర్వేటివ్​ యాక్టివిస్ట్​ చార్లీ కిర్క్​(31) దారుణ హత్యకు గురయ్యారు. ఉటా వ్యాలీ యూనివర్సిటీ కార్యక్రమంలో ఆయన మాట్లాడుతుండగా, ఓ దుండగుడు ఆయనపై కాల్పులకు పాల్పడ్డాడు. దీంతో చార్లీ కిర్క్​కు తీవ్ర గాయాలయ్యాయి. వెంటనే ఆయన్ని ఆసుపత్రికి తరలించగా చికిత్స పొందుతూ మరణించారు. ఈ మేరకు కిర్క్​ చనిపోయినట్లు ట్రంప్ ధ్రువీకరించారు. కాగా ఈ ఘటనతో కార్యక్రమంలో ఉన్నవారంతా భయాందోళనకు గురయ్యారు.

విద్యార్థి అడిగిన ప్రశ్నకు బదులిస్తుండగా కాల్పులు!
కన్జర్వేటివ్​ యాక్టివిస్ట్ కిర్క్​ ఉటా వ్యాలీ యూనివర్సిటీలో జరిగిన కార్యక్రమానికి హాజరయ్యారు. అనంతరం ఓ టెంట్​లో కూర్చొని విద్యార్థి అడిగిన ప్రశ్నకు బదులిస్తున్న సమయంలో దుండగుడు ఆయనపై కాల్పులు జరిపాడు. దీంతో మెడ భాగంలో తీవ్ర గాయమై ఆయన ఒక్కసారిగా కుప్పకూలిపోయారు. వెంటనే ఆసుపత్రికి తరలించగా చికిత్స పొందుతూ మరణించారు. ఈ మేరకు ట్రంప్​ తన ట్రూత్​ సోషల్​ పేర్కొన్నారు. ఈ ఘటనతో కార్యక్రమానికి హాజరైన పలువురు భయంతో పరుగులు తీశారు. చార్లీపై కాల్పులకు పాల్పడ్డ నిందితుడిని అదుపులోకి తీసుకున్నామని ఎఫ్​బీఐ డైరెక్టర్​ కాష్​ పటేల్​ పేర్కొన్నారు. కాగా ఘటనకు సంబంధించి సామాజిక మాధ్యమాల్లో పోస్టులు చక్కర్లు కొడుతున్నాయి.