మానవ హక్కులు – సమాజానికి అద్దం

మానవ హక్కులు అంటే ప్రతి మనిషికి పుట్టుకతోనే లభించే సహజ హక్కులు. ఇవి ఏ చట్టం వల్లా కాకుండా మనిషిగా మనం పుట్టినందుకు లభించిన హక్కులు. మానవ హక్కుల్లో జీవన హక్కు, స్వేచ్ఛా హక్కు, సమానత్వం, విద్య, ఆరోగ్యం, అభివృద్ధి, గౌరవప్రదమైన జీవితం గడపడానికి అవసరమైన అన్ని హక్కులు ఉంటాయి.

1948 డిసెంబరు 10న ఐక్యరాజ్య సమితి మానవ హక్కుల సర్వత్ర ప్రకటనను ఆమోదించింది. ఆ రోజు నుంచి ప్రతి సంవత్సరం డిసెంబరు 10ను మానవ హక్కుల దినోత్సవంగా జరుపుకుంటున్నారు. మన దేశంలో 1993లో జాతీయ మానవ హక్కుల కమిషన్ (NHRC) స్థాపించబడింది. రాష్ట్రాల స్థాయిలో కూడా మానవ హక్కుల కమిషన్లు ఏర్పడ్డాయి.

అయితే నేటికీ సమాజంలో అనేక రకాల మానవ హక్కుల ఉల్లంఘనలు జరుగుతూనే ఉన్నాయి. కుల, మత, లింగ వివక్ష, మహిళలపై దాడులు, బాల కార్మికత్వం, బలవంతపు పనులు, అన్యాయ అరెస్టులు, నిర్బంధాలు వంటివి సమాజంలో మానవ హక్కుల పరిస్థితిని ప్రతిబింబిస్తున్నాయి.

మానవ హక్కులను కాపాడటంలో ప్రభుత్వంతో పాటు పౌరులందరికీ బాధ్యత ఉంది. ప్రతి ఒక్కరూ తమ హక్కులను తెలుసుకోవాలి, ఇతరుల హక్కులను గౌరవించాలి. మానవ హక్కుల పరిరక్షణ వలన సమాజంలో సమానత్వం, శాంతి, సోదరభావం నెలకొంటాయి. అందుకే మానవ హక్కులను సమాజానికి అద్దం అని చెప్పవచ్చు.